ਇੰਝ ਲੱਗਦਾ ਜਿਵੇਂ

ਜਦ ਮੈਂ ਦੇਖਾਂ ਉਹਦੇ ਵੱਲ ਨੂੰ
ਉਹ ਦੇਖੇ ਵੱਲ ਮੇਰੇ
ਇੰਝ ਲੱਗਦਾ ਜਿਵੇਂ ਕਾਲੀ ਰਾਤ ਦੇ
ਚੰਨ ਕਰ ਗਿਆ ਦੂਰ ਹਨੇਰੇ

ਜਦ ਕਦੀ ਵੀ ਨਜ਼ਰ ਮੇਰੀ
ਨਜ਼ਰ ਉਹਦੀ ਨਾਲ ਟਕਰਾਉਂਦੀ
ਇੰਝ ਲੱਗਦਾ ਜਿਵੇਂ ਵਿੱਚ ਬੱਦਲ਼ਾਂ ਦੇ
ਬਿਜਲੀ ਭੰਗੜੇ ਪਾਉਂਦੀ

ਜਦ ਕਦੀ ਮੈਂ ਉਹਦੀ ਗਲੀ ਚੋਂ ਲੰਘਾਂ
ਉਹ ਬੂਹੇ ਵਿੱਚ ਖੜ ਜਾਵੇ
ਇੰਝ ਲੱਗਦਾ ਜਿਵੇਂ ਭੌਰੇ ਕੋਲ਼ੇ
ਫੁੱਲ ਖੁਦ ਚਲ ਕੇ ਆ ਜਾਵੇ

ਅਕਸਰ ਖਿਆਲਾਂ ਦੇ ਵਿੱਚ ਮੈਨੂੰ
ਉਹ ਆ ਕੇ ਮਿਲ ਜਾਵੇ
ਇੰਝ ਲੱਗਦਾ ਜਿਵੇਂ ਉਸ ਨੂੰ ਡਰ ਹੈ
ਕਿਤੇ ਜੱਗ ਦੀ ਨਜ਼ਰ ਨਾਂ ਲੱਗ ਜਾਵੇ

ਨਾਂ ਕਦੀ ਬੋਲੇ ਨਾਂ ਕਦੀ ਛੂਹਿਆ
ਨਾਂ ਕਦੀ ਪਿਆਰ ਜਤਾਇਆ
ਇੰਝ ਲੱਗਦਾ ਜਿਵੇਂ ਰੱਬ ਨੇ ਸਾਡੇ ਹਿੱਸੇ
ਬੱਸ ਗੂੰਗਾ ਪਿਆਰ ਹੈ ਪਾਇਆ

ਖਿਆਲਾਂ ਤੇ ਨਜ਼ਰਾਂ ਦੀ ਮੇਰੀ
ਇਹ ਹੈ ਇੱਕ ਪ੍ਰੇਮ ਕਹਾਣੀ
ਇੰਝ ਲੱਗਦਾ ਜਿਵੇਂ ਮਨ ਮੇਰੇ ਦੀ
ਇਹ ਹੈ ਕੋਈ ਖੇਡ ਸ਼ੈਤਾਨੀ

ਹਰ ਜੀ ੦੬-੦੯-੨੦੧੫