ਮੈਂ ਵੱਖਰਾ ਤੇ ਮੇਰਾ ਰੱਬ ਵੀ ਵੱਖਰਾ
ਅਸੀਂ ਵੱਖਰੇ ਜਹਾਂ ਦੇ ਵਾਸੀ
ਨਾਂ ਅਸੀਂ ਕਦੇ ਮਿਲੇ ਇਸ ਜੱਗ ਤੇ
ਫਿਰ ਵੀ ਸਾਂਝ ਹੈ ਸਾਡੀ ਖਾਸੀ
ਓਹ ਆਪਣੇ ਘਰ ਮਸਤ ਮਲੰਗ
ਤੇ ਮੈਂ ਆਪਣੇ ਚਾਂਗਾਂ ਮਾਰਾਂ
ਪਰ ਅਕਸਰ ਸਾਨੂੰ ਮਿਲਦੀਆਂ ਰਹਿੰਦੀਆਂ
ਇੱਕ ਦੂਜੇ ਦੀਆਂ ਸਾਰਾਂ
ਨਾਂ ਹੀ ਮੰਗਣ ਤੇ ਕੁਝ ਦੇਵੇ
ਤੇ ਨਾਂ ਮੈਂ ਓਹਤੋਂ ਕੁਝ ਮੰਗਦਾ
ਜੋ ਉਸਨੂੰ ਕੁਝ ਚੰਗਾ ਲੱਗਦਾ
ਖੋਹਣ ਤੋ ਵੀ ਨਾਂ ਓਹ ਸੰਗਦਾ
ਜਦ ਉਸ ਮੈਨੂੰ ਕੁਝ ਦੇਣਾ ਹੁੰਦਾ
ਓਹ ਦੇ ਜਾਂਦਾ ਚੁੱਪ ਕਰਕੇ
ਮੈਂ ਵੀ ਨਾਂਹ ਕਦੇ ਨੀਂ ਆਖੀ
ਨਾਂ ਰੋਕਿਆ ਹੱਥ ਓਹਦਾ ਫੜਕੇ
ਸਾਡਾ ਰਿਸ਼ਤਾ ਬੜਾ ਅਨੋਖਾ
ਨਾਂ ਹੀ ਇਹ ਇੱਕ ਤਰਫ਼ਾ
ਇਹ ਤਾਂ ਬੱਸ ਮਹਿਸੂਸ ਹੀ ਹੁੰਦਾ
ਬਿਆਨ ਹੋ ਨੀ ਸਕਦਾ ਵਿਚ ਹਰਫਾਂ
ਆਪਣੀ ਰਜ਼ਾ ਵਿਚ ਓਹ ਹੈ ਰਾਜੀ
ਤੇ ਮੈਂ ਰਾਜ਼ੀ ਵਿਚ ਓਹਦੀ
ਬਾਕੀ ਸਭ ਹੈ ਝੂਠ ਦਿਖਾਵਾ
ਗੱਲ ਸਾਰੀ ਹੈ ਮੋਹ ਦੀ
HSD 23/09/2014
No comments:
Post a Comment