ਮੰਗਤਾ

ਮੰਗਤਿਆਂ ਦੀ ਦੁਨਿਆ ਹੈ ਇਹ
ਇਥੇ ਹਰ ਇਕ ਬੰਦਾ ਮੰਗੇ
ਕੋਈ ਬੇਝਿਝਕ ਹੋਕੇ ਮੰਗਦਾ
ਕੋਈ ਮੰਗਣ ਲੱਗਿਆ ਸੰਗੇ
ਕੋਈ ਵਿਚ ਚੁਰਾਹੇ ਮੰਗਦਾ
ਕੋਈ ਰੱਬ ਦੇ ਘਰ ਲੁੱਕ ਮੰਗੇ
ਜਦ ਮੈਂ ਵੀ ਮੰਗਤਾ ਤੁਸੀਂ ਵੀ ਮੰਗਤੇ
ਫਿਰ ਕੌਣ ਬੁਰਾ ਕੌਣ ਚੰਗੇ

ਪਹਿਲਾਂ ਪਹਿਲਾਂ ਮਾਂ ਕੋਲੋਂ ਮੈਂ
ਰੋ ਰੋ ਕੇ ਦੁਧ ਮੰਗਿਆ
ਭੁਖ ਲੱਗੀ ਰੋਟੀ ਦੇ ਬੇਬੇ
ਇਹ ਕਹਿਣੋ ਕਦੇ ਨੇ ਸੰਗਿਆ
ਕੁਝ ਨਾਂ ਕੁਝ ਮੈਂ ਲੈਣ ਬਹਾਨੇ
ਸਦਾ ਪੈਸੇ ਬਾਪੂ ਤੋਂ ਮੰਗੇ
ਜਦ ਮੈਂ ਵੀ ਮੰਗਤਾ ਤੁਸੀਂ ਵੀ ਮੰਗਤੇ
ਫਿਰ ਕੌਣ ਬੁਰਾ ਕੌਣ ਚੰਗੇ

ਧੰਨ ਦੌਲਤਾਂ ਰੱਬ ਤੋਂ ਮੰਗੀਆਂ
ਓਹਦੇ ਘਰ ਵਿਚ ਜਾਕੇ
ਕੰਨ ਪਕੜ ਕੇ ਨੱਕ ਰਗੜਿਆ
ਓਹਨੂੰ ਤੁਛ ਜੀ ਭੇਟ ਚੜਾਕੇ
ਰੱਬ ਨੂੰ ਵੀ ਮੈਂ ਮੰਗਤਾ ਸਮਝਿਆ
ਦੇਵਾਂ ਓਹਦੇ ਨਾਂ ਤੇ ਚੰਦੇ
ਜਦ ਮੈਂ ਵੀ ਮੰਗਤਾ ਤੁਸੀਂ ਵੀ ਮੰਗਤੇ
ਫਿਰ ਕੌਣ ਬੁਰਾ ਕੌਣ ਚੰਗੇ

ਮੰਗ ਮੰਗ ਮੈਂ ਝੋਲੀ ਭਰਲੀ
ਇਹ ਹੈ ਮੇਰੀ ਕਹਾਣੀ
ਹੁਣ ਲੋੜਵੰਦਾਂ ਦੀ ਮੱਦਦ ਕਰਦਾਂ
ਬਣ ਮੰਗਤੇ ਤੋਂ ਦਾਨੀ
ਦੁਨੀਆ ਦਾ ਦਸਤੂਰ ਇਹ ਕੈਸਾ
ਇਥੇ ਮੰਗਤਾ ਮੰਗਤੇ ਤੋ ਮੰਗੇ
ਜਦ ਮੈਂ ਵੀ ਮੰਗਤਾ ਤੁਸੀਂ ਵੀ ਮੰਗਤੇ
ਫਿਰ ਕੌਣ ਬੁਰਾ ਕੌਣ ਚੰਗੇ