ਮੇਰੀ ਦਿਸ਼ਾ

ਬਚਪਨ ਵਿਚ ਤੁਰ ਗਿਆ ਉਸ ਪਾਸੇ 
ਜਿਧਰ ਮਾਂ ਪਿਓ ਨੇ ਘੱਲਿਆ 
ਵਿਚ ਜਵਾਨੀ ਤੁਰ ਗਿਆ ਉਧਰ
ਲੈ ਜਿਧਰ ਨੂੰ ਦਿਲ  ਚੱਲਿਆ 

ਜਦ ਘਰਵਾਲੀ ਅੱਗੇ ਲੱਗ ਕੇ 
ਚਾਰ ਕੁ  ਲੈ ਲਈਆਂ ਲਾਵਾਂ
ਉਸ ਦਿਨ ਤੋਂ ਲੈ ਕੇ  ਹੁਣ ਤੱਕ 
ਬਸ ਉਸੀ ਦੇ ਪਿਛੇ ਜਾਵਾਂ 

ਲਹਿੰਦੀ ਉਮਰੇ ਰਾਹ ਦੇਖਣ ਲਈ 
ਐਨਕਾਂ ਦਿੱਤਾ ਸਹਾਰਾ 
ਜਿੰਦਗੀ ਦੇ  ਇਸ ਸਫਰ ਸੋਹਾਣੇ 
ਵਿਚ ਵੇਖ ਲਿਆ ਜੱਗ ਸਾਰਾ  

ਬਹੁਤੀ ਨਿੱਕਲੀ ਥੋੜੀ ਰਹਿਗੀ 
ਛੁੱਟਦੀ ਜਾਂਦੀ ਰੋਟੀ 
ਅੱਗੇ ਦਾ ਇਹ ਸਫਰ ਜੋ ਰਹਿੰਦਾ 
ਕੱਟ ਜੂ ਹੱਥ ਫੜ ਕੇ  ਸੋਟੀ 

ਤੁਰਨੋ ਜਦੋਂ ਜਵਾਬ ਦੇਣਗੀਆਂ 
ਮੇਰੀਆਂ ਇਹ ਦੋ ਲੱਤਾਂ  
ਚਾਰ ਭਾਈਆਂ ਦੇ ਮੋਢੇ ਚੜਕੇ 
ਮੈਂ ਆਖਰੀ ਵਹੀਰਾਂ ਘੱਤਾਂ 


HSD 08/12/2014