ਅਹਿਸਾਸ

ਮੈਨੂੰ ਅਹਿਸਾਸ ਹੈ
ਧੌੜੀ ਨੂੰ ਪਈ ਕੁੱਟ ਦਾ
ਤਾਂਹੀ ਤਾਂ ਸਹਿ ਲੈਂਦੇ ਨੇ
ਮੇਰੇ ਪੈਰ ਛਾਲਿਆਂ ਨੂੰ

ਮੈਨੂੰ ਅਹਿਸਾਸ ਹੈ
ਬੱਕਰੇ ਦੇ ਪੀੜ ਦਾ
ਤਾਂਹੀ ਤਾਂ ਸੁਣ ਲੈਂਦੇ ਨੇ
ਮੇਰੇ ਕੰਨ ਢੋਲ ਦੀ ਅਵਾਜ਼

ਮੈਨੂੰ ਅਹਿਸਾਸ ਹੈ
ਕੁਦਰਤ ਦੇ ਨਿਯਮਾਂ ਦਾ
ਤਾਂਹੀ ਤਾਂ ਦੇਖ  ਲੈਂਦੇ ਨੇ
ਮੇਰੇ ਨੈਣ ਇਹ ਕੁਦਰਤੀ ਨਜ਼ਾਰੇ

ਮੈਨੂੰ ਅਹਿਸਾਸ ਹੈ
ਨਾਨਕ ਦੇ ਦਿੱਤੇ ਸੁਨੇਹੇ ਦਾ
ਤਾਂਹੀ ਤਾਂ ਕਰ ਲੈਂਦੇ ਨੇ
ਮੇਰੇ ਹੱਥ ਹੱਕ ਸੱਚ ਦੀ ਕਮਾਈ

ਮੈਨੂੰ ਅਹਿਸਾਸ ਹੈ
ਰੱਬ ਦੇ ਦਿੱਤੇ ਸੁਨੇਹੇ ਦਾ
ਤਾਂਹੀ ਤਾਂ ਕਹਿ ਲੈਂਦੇ ਨੇ
ਮੇਰੇ ਹੋਂਠ ਅਕਸਰ ਸਚਾਈ .

ਮੈਨੂੰ ਅਹਿਸਾਸ ਹੈ
ਜਨੇਪੇ ਦੀਆਂ ਪੀੜਾਂ ਦਾ
ਤਾਂਹੀ ਤਾਂ ਚੁੱਕ ਲੈਂਦੇ ਨੇ
ਮੇਰੇ ਮੋਢੇ ਮਾਂ ਦਾ ਕਰਜ਼