ਧੰਨ ਨੇ ਉਹ ਮਾਪੇ
ਜੋ ਆਪਣੀ ਉਲਾਦ ਦੀ
ਅਰਥੀ ਦਾ ਭਾਰ
ਆਪਣੇ ਮੋਢਿਆਂ ਤੇ
ਚੱਕ ਕੇ ਵੀ ਤੁਰ ਸਕਦੇ ਨੇ
ਮੈਨੂੰ ਤਾਂ ਮੇਰੇ
ਮਾਪਿਆਂ ਦੀ
ਅਰਥੀ ਦੇ ਭਾਰ ਨੇ ਹੀ
ਤੋੜ ਛੱਡਿਆ
ਅਕਸਰ ਸੋਚਦਾਂ ਹਾਂ
ਕਿ ਕਿਵੇਂ ਹੋ ਜਾਂਦਾ
ਉਹਨਾਂ ਦਾ ਜਿਗਰਾ
ਪਹਾੜ ਵਾਂਗ ਅਟੱਲ
ਕਿਵੇਂ ਕਰ ਲੈਂਦੀ ਹੈ
ਮੁਸਕਾਨ ਮੁੜ ਵਾਸਾ
ਉਹਨਾਂ ਦੇ ਚਿਹਰਿਆਂ ਤੇ
ਹੋ ਸਕਦਾ ਇਸ ਤੋਂ ਬਿਨਾ
ਓਹਨਾ ਕੋਲ ਹੋਰ
ਕੋਈ ਰਸਤਾ ਵੀ ਨਾਂ ਹੋਵੇ
ਇਹ ਵੀ ਹੋ ਸਕਦਾ
ਵੇਖਦੇ ਹੋਣਗੇ ਉਹ
ਆਪਣੀ ਉਲਾਦ ਦੇ
ਸੁਪਨਿਆਂ ਨੂੰ
ਸ਼ਾਇਦ ਇਹ ਸੁਪਨੇ ਹੀ
ਦੇਂਦੇ ਹੋਣਗੇ ਉਹਨਾਂ ਨੂੰ
ਇਹ ਹਿੰਮਤ
ਲਗਦੇ ਹੋਣਗੇ ਉਹਨਾਂ ਦੇ
ਝੁਕਦੇ ਮੋਢਿਆਂ ਹੇਠ
ਬਣਕੇ ਫੌਹੜੀ
ਜੋ ਦਿੰਦੀ ਹੋਵੇਗੀ
ਉਹਨਾਂ ਦੀਆਂ
ਡਗਮਗਾਉਂਦੀਆਂ
ਲੱਤਾਂ ਨੂੰ ਸਹਾਰਾ
ਧੰਨ ਨੇ ਉਹ ਮਾਪੇ
ਧੰਨ ਹੈ ਉਹਨਾਂ ਦਾ ਜਿਗਰਾ
ਹਰ ਜੀ 07/09/2017
No comments:
Post a Comment